ï»؟ فصل2/1.. فائقات
السبت، سبتمبر 02، 2006
سموم المناهج
التعليم وتوصيل صورة التعليم الي الناس بعد تخلي الاعلام عن الطلبه هو هدفنا من المدونة دي
وانا بافكر اكتب ايه كنت محتاره جدا اكتب عن المدرسين باعتبار ان الانسان والعامل البشري عامل مهم جدا في التعليم ولا عن المناهج بعد ان انحدرت بشكل كبير جدا وايضا لابد من لفت النظر الي الية التعليم وازاي بيعلموننا ازاي بندرس في مدارس مصر
وضحت قبل كده هدفنا ولكني اكتب الان ولست متيقنه من الجدوي من الكتابه لاننا دايما بنتكلم ومافيش نتيجه بس كاقل قليل ممكن يكون فضفضه احنا طلبة مكبوته في المدراس لكن الهدف الاسمي من كده هو اننا نحاول نوصل صورة التعليم لاي حد بعد ما تخلي عنا الكثيرين وحتي يكفيينا شعوركم بالاسي من اجلنا هذا التضامن علي الاقل يكفينا
احترت كثيرا بايهم ابدأ ولكني رسيت علي المناهج فالمناهج خطيره دي حتي اسمها منهج يعني حاجة الطلبة المفروض انها تمشي عليها
انا لسة طالعة من اولي ثانوي تانيه ثانوي لسه ما تعمقتش فيها بس الاكيد ان منهج العربي من اهم المناهج لانه كمادة بيبقي عبارة عن دروس قراءه ونصوص حاجات كلها بتسيب خبرة في العقل كنت دايما باتخنق من دروس القراءه ومن سوء اختيارها زي ما قولت يعني مثلا طلبة في اولي ثانوي عندهم 14 سنه وده سن مش صغير يكلموهم عن مدن خيالية لا مدن عبيطه مدينة مشعلقه في السما لا جاذبية بقي ولا زفت ومدينة تانيه عباره عن صوبه زي بتاعت الخيار والطماطم والحاجات دي كلام لا يصح ان يقال عليه سوي لعب عيال
حتي معني وجمال الخيال مفتقد منه وماهواش علمي باي شكل من الاشكال ولو قصدهم اسلوب بلاغي فقط اسلوب الدرس كان في منهتي الركاكه الدرس ما كنش ينفع يتقال عليه غير ان اللي كتبه كان مزنوق في درس علشان يكمل المنهج نام شويه حلم انه كان طاير وقع طار تاني دخل جوا حنفيه عدي منها عالمدينة دي لقي نفسه خيارايه مزروعه ..اي هبل المهم انه كتب حاجه وخلاص
الاخطر من كده –والدرس ده ليه نماذج عديده مشابه مش ده حاجه لوحدها كده جوا المنهج لا انا قولته بس علي سبيل المثال وليس الحصر بالتاكيد في عن التلفزيون وعن التليفون وعن الطباعه
الاخطر من كده نماذج عديده لدرس تاني اسمه الصياد الدرس عباره عن حوار بين واحد صياد وواحد بيشتري منه سمك وكانت العبرة والرسالة اللي تطلع في النهاية ان الناس الفقرا دول في نعمة وان الاغنيا دول شكلهم حلو بس من بره لكن دول بالنص "بيحاطوا باعين الناس" يعني بيتحسدوا من الاخر وكانت النتيجة من الدرس انه
شوش في دماغ الطلبة الفرق بين كلمة حلم وكلمة طمع كل حالم طماع من وجهة نظر الدرس ده غير انه بيحاول يثبت انه ما فيش افضل من ان الانسان يلاقي كل يوم اكله وحته ينام فيها
الدرس ده كان ممكن يكون ذا جدوي لوكان مكتوب لناس عندها 80 سنة المفروض تقول الحمد لله ويلا بقي نموت ولو ان الانسان مكلف بالعمل والجد لاخر لحظه في حايته بس كانت ممكن تكون مبلوعه شويه لكن ما لا يطاق علي الاطلاق فعلا انه يكون لطلبه لسه في بداية حياتهم طلبه المفروض ان كل واحد فيهم بيبتدي يحط احلامه وخططه لحياته في دماغه. الدرس خطير فعلا
نص تاني وانا باحاول اني ما اطيلش في الكاتبه وهلخصه هو عباره عن رساله الي حاكم ايام الخلافه ومش متذكره أي خلافه بالتحديد ومش هاتفرق المهم النص كان فيه كمية تمجيد للحاكم واحتقار لعقول الشعب والمفروض اننا عدينا فترة الحكم الملكي ده من زمان النص كان عباره عن شوية تشبيهات هاقول مضمونها وشفوا انتوا بقي
كان بيصور الحاكم علي انه كالراعي الحريص علي ابله
وانه في حمايته للشعب كالاب اللي بيرعي ابنه اللي مش عارف مصلحته
وانه كالام اللي بتاخد بالها من ولادها لحد ما يتفطموا
وماكنش في اي نقد للنص ده وكأننا عايشين من كام قرن فات ولا كأن في ديموقراطية دلوقتي ولا حاجه
اللي انا عايزه اوصله ان التعليم والطلبه بجد في حاله خطيره جدا وان لو النموذج من البشر اللي انا باشوفه في المدرسه هما دول اللي هايبقوا الشعب المصري كمان كام سنه دي تبقي مصيبه
متخيلين ان نجاح الطلبه في انهم يخرجوا من الغيبوبه ومن النوم المغنطيسي اللي احنا عايشين فيه ومن حالة التجمد دي وانهم علشان ينموا يبقي ده بيتوقف علي كتاب مثلا هتقراها طالبه بالصدفه
ساعات كتير باقول مش مهم ما في ناس كتير طلعت من نفس التعليم ده وبتكون شخصيات بتفهم بس انا نفسي لما بافكر فيا انا ثقافيا افرق عن السنه اللي فاتت طب اللي قبلها دايما بتكون المحصله النهائيه حاجه بسيطه اوي ما تلقيش بالفتره اللي انا فيها واللي المفروض يكون قدرتي علي الاستيعاب فيها اكبر من كده بمراحل
بس قبل ما اختم انا عايزه اوصف رد الفعل بتاع الطلبه لما انا اعترضت علي النص الاخير بتاع الحاكم وكنت باقول ده استهزاء بعقولنا كشعب ولأ احنا مش غنم ولأ احنا مش اطفال واحنا عايشيين في عصر ديموقراطية
لاقيت صيحات من الفصل لا طبعا هو ايه ده يا سلام يعني انتي تعرفي تحكمي مصر لازم يكون في حد بيحكمنا وماكنوش فاهميين يعني ايه تداول سلطة
وبعدين رد الفعل الطبيعي المتوقع من هيئه بتعمل في التدريس في ظل التعليم ده" بس يا بنات خلينا نخلص الدرس وبلاش نطلع بره الموضوع وبلاش فلسفه كلمتها قالتلي مش هاتمتحني غير في جماليات ومعاني مفردات."
 
posted by noran at 9/02/2006 07:42:00 م | Permalink |


13 Comments:


  • At 9/03/2006 1:06 ص, Blogger محمود عزت

    المناهج التعليمية في مصر أشبه بتدريب مجموعة من المدرسين المعاقين على التدريس لطلبة من ذوي الإحتياجات الخاصة
    انا لسه فاكر النصوص بتاعت ثانوي اللي فعلا قتلت في الواحدالقدرة على تذوق الشعر أو الفن من أساسه !

    كويس والله إن فيه طالبة واحدة أخدت بالها!

    جميل يا نوران

    واصلي الكتابة

     
  • At 9/03/2006 5:35 ص, Blogger Nouran

    بلوج حلو اوي ع فكرة انا كنت ساكته بس انتوا اللي فتحتوني ومليش انا دعوه ماشي
    طبعا انا ف فصل المتفوقين ده منذ قديم الاذل بس كنا مضهدين معرفش ليه احنا كنا حاجة تقرف انت ف كام فصل المتفوقين تبص كده وتمشي حاجة وحشة جدا اما بالنسبة للمناهج فعرفة السنة دي منهج الفيزيا كان فانتازيا وفيه غلطات بالهبل والاسئلة غلط اما العربي ولله الحمد فشغله المدرس حشو الدماغ ومفيش ولا نصوص ولا تذوق ولا اي حاجة فيكي يا لغة حشو ودش حشو ودش بس مش اكتر الانجليزي لم يمثل اي اضافة ليا من ابتدائي نفس الحاجة اللي بناخدها جالنا عقم ف التفكير خلاص وايه يجوا ف الامتحانات وع الفزلكة اللي بيعملوها اما الاقتصاد فرائع جدا ولا الجزء بتاع العولمة والبورصة محطوط زي الزفت فعلا والاحصاء حاجة هبلة كده بس الامتحان كان فعلا جاامد فرحت بيه جدا والله بجد امتحان مختلف وامتحان الرياضة برضه كان \ماغ كان حلو اوي عايز تفكير و تحلليل نسيت حاجة ف مواد السنة دي ولا كفاية كده ايه رايكوا ف المناهج والامتحانات ربنا يتوب علينا يا رب ولما يجيبوا الامتحان عايز تفكير يقوموا الدنيا وميقعدوهاش تاني كل ده علشان جه امتحان ولا اتنين صعب بس بصراحة الامتحانات مش بتليق ع المناهج انا تعبت فعلا كفاية كده

     
  • At 9/03/2006 8:47 ص, Blogger noran

    محمود عزت
    فعلا عندك حق هجموعه من المدرسين المعاقين وكمان المرضي نفسيا بيدرسوا لطلبه عندهم تاخر

     
  • At 9/03/2006 8:57 ص, Blogger noran

    nouran
    اه فصول الفائقات
    افتكرت الالام اللي كنا بنعانيها كفصل انتي عارفه في الطبور بيبقي فصول المدرسه كلهم عاملين دايره بحيث تبقي في الضل وبيبقي في حته في النص اللي بيبقي ادامها بتوع الاذاعه وفي نصها العلم الناظره المفتريه كان بتوقف دايما فصل الفائقات في النص علشان نتحرق في الشمس مره وقفتنا ساعتين في الشمس تاني يوم كان عندها عدد مهول من اولياء الامور البنات كلهم جات لهم ضربة شمس ده في الجيش ما بيعملوش كده بس الحمد لله انا كنت غايبه
    وكل ما تشوف واحده فينا تقولها انتي ولا حاجه
    طب ياستي هو في حد قالك حاجه متهيألي هي وهي في ثانوي كانت واحده لئيمه في فصل الفائقات ايامها بتغلس عليها فاجتلها عقدة نقص
    متخيله ان بابا كان مره جاي ياخدني من المدرسة فسالته هي فصل ايه قالها فائقات اتفحت فيه فائقات علي نفسهم هما هايجوا يطنطوا علينا وهو اصلا بيقول رقم الفصل بس
    عقد نفسيه عند المدرسين بحالهم وفي كل الاشكال
    المناهج اللي قولتي عاليها ما خدتش اغلبها لسه رايحه تانيه ثانوي بس متوقعاها دلوقتي وبالذات نقطة انها مش راكبه علي دماغ الطلبه

     
  • At 9/03/2006 3:44 م, Blogger Nouran

    بجد لسة رايحة تانية ثانوي بصي تانية ثانوي حلوة الالماني لذيذ لو كنت الماني والكيمياء حلوة بس برضه ع حسب المدرس ربنا معاكي وترفعي راس فصل المتفوقين -من فصل المتفوقين سابقا- ربنا يكرمكوا

     
  • At 9/03/2006 9:40 م, Blogger noran

    nouran
    ايوه لسه رايحه تانيه ثانوي تخيلي لسه في تالته كمان انا بدات ازهق من دلوقتي
    وانا الماني وكمان كيما ودول مادتين جمال جدا ومافيهومش عك كتير
    وطبعا الرياضه صحيح ماده علي قد حالها لكن جمييييله
    وربنا يسهل

     
  • At 9/04/2006 9:34 م, Blogger BaTresYa

    بما اني ثانويه عامه سابقاً وجبت مجموع نص كم وفردة كاوتش فأحب أطمنكم انكم مش تبنوا أحلام ناو صدقوني خدو السنه عادي ومش تشدوا جامد احسن يجي لكم شد عضل
    بالنسبه للمنهج دا يحمروا عليه بطاطس او بتنجان هيشرب الزيت كويس

    بجد ياريت ياخدو رأي الطلبه في البتنجان اللي هنحشي بيه دماغنا لأنه بالنسبه لنا طلاسم يعني تخيلي والله انا مفهمتش النحو إلا في 3ث والرياضيات دي انا بطيخه فيها يعني لأنها حاجه مش مفهومه وتعقيديه يعني يقولكـ مره مماس على دائره وتقاطع مماس اخر في زاويه اخرى احسب كم مماس في المسأله ونوع القلم الرصاص الذي رسم المماس
    بتنجان يعني
    دا كوم بقى اما اللي عيزاكم تكتبوا عنه هو الكوسه في التصحيييييييييييييييييييييييييييييح انا اكتر واحدة اتظلمت في التصحيح مستقبلي ضاع بسبب التصحيح دا

     
  • At 9/06/2006 5:20 ص, Blogger noran

    اه التصحيح تصوري انا خايفه منه لدرجة ان بقت حاجه بديهيه في دماغي اني هاتظلم في التصحيح
    بصي انا هاقولك حاجه طريفه كدليل واحد بس علي ان اللي بيحصل في التصحيح ده اقل واجب وان الكوسه المفروض تتعدي المراحل دي بكتير علي اساس الظروف اللي المدرسين بيعيشوها وهما بيصححوا
    متخيله في عز الحر بيقعدوهم في الحوش وعلشان ما حدش يشوفهم بيغطوهم بقماش اللي هو زي بتاع العزي ده ومش بيقبي فيه مراوح جوا الحته اللي قاعدين فيها دي واللي كل ما اتخيل اني قاعده فيها احس اني قاعده في صوبه ده غير انهم بياخروهم جدا وكل واحد بيبقي قدامه كم ورق لازم يصححه في وقت معين واللي بيصحح سؤال صح وغلط مثلا زي اللي بيصحح سؤال دش في نفس الوقت
    كل ده علشان يطلعوا النتيجه بدري
    وزودي علي كده في الظلم ان الغلط في التصحيح مش في التجميع مش بيتصلح
    وكمان ان نموذج الاجابه ساعات كتير ينزل غلط او لو في حلين ينزل واحد ويبقي التاني صح بس الغباء الازلي في المدرسين بيخليهم يقولوا نلتزم بنموذج الوزاره
    بجد ربنا معاكي وان شاء الله ده يكون خير
    لكن متهيألي انا عن نفسي اقدر استحمل اي حاجه تعليم بايظ اي حاجه الا اني اتظلم صعبه اوي

     
  • At 11/03/2006 2:42 ص, Blogger santakarim

    this is really a diffrent blog, i'm glad that the students themselves started to get aware of the trick :-)
    this is the first time for me here, and i've noticed that it's been about 2 months since your last post, don't stop girls go on, if you don't mind i'd like to add your link to my blog, good luck..

     
  • At 11/11/2006 12:02 ص, Blogger nada

    santa karim
    اهلا بيك
    و معلش ان احنا مبنكتبش بس حنحاول ان شاء الله
    و اكيد ممكن تعملنا لينك
    و شكرا لمرورك

     
  • At 6/17/2007 10:01 م, Blogger Sharm

    شكل المدونة لذيذ

     
  • At 9/25/2011 4:01 م, Anonymous نادي حواء

    شكرا علي مجهودك

     
  • At 10/11/2011 4:53 م, Anonymous نادى الاخبار

    موضوع جميل
    شكرا لك