ï»؟ فصل2/1.. فائقات
السبت، أغسطس 26، 2006
نموذج لمربيه الاجيال تبعا لوزاره التربيه و التعليم
هي ناجحه في عملها و بارزه في مجالها ترقت في المناصب حتى وصلت الى ناظره مدرسه الثانويه بنات , تنال احترام و تقدير معظم مدرسين المدرسه بدعوى انها " بتظبط المدرسه صح" .ء
كان صوتها الجهوري يرن في ارجاء المدرسه فترتعد له الاوصال و كان موجات صوتها المرعبه تبعث على النظام و استتاب الامن .ء
كانت التلميذات كلما شعرن بسريان اشاعه بقدوها الى فصلهن تدب فيهم روح النظام و النظافه (و الرعب)فيسرعن بتنظيف الفصل و ابراز الكتب و الكراسات.ء
كانت اولى اولوياتها هي انتظام الطابور المدرسي و ارتفاع اصوات الفتيات بالتغني بالنشيد الوطني و عدم الحديث مع بعضهن البعض و تطبيق نشره الوزاره بترديد كلمه " مصر " ثلاث مرات في الطابور و عند دخول الفصل-و كأنها اذكار صباح و مساء-, كانت مدرستنا فتره مسائيه فتسارع الفتيات للحاق بصلاه الظهر قبل بدء الحصه الاولى و لكن هذا لم يرحمهن من قبضتها الحديديه فكانت كثيرا ما كانت توقف فتاه او اثنتين -كانهم عساكر امن مركزي -لمنع الفتيات من دخول المسجد و لكن احيانا كانت الفتيات (الامن) يسمحون للناس بدخول المسجد من باب الضمير الديني فتجيء هي (مزعقه )بصوتها الحازم لتوبخ الفتيات و تسبهم لانهم يضعون حقائبهم في المسجد او يخلعون احذيتهم على عتبته من الداخل او يتركون الطابور للصلاه .ء
كان دائما لها موقف خاص من فصلي الفائقات في المدرسه فاسوف تظل كلمتها الخالده لنا تترد في اذني " انتوا فاكرين نفسكوا حاجه انتوا زباله المدرسه"مع اننا لم نرى في انفسنا ما يميزنا عن غيرنا فقد كنا في الصف الاول الثانوي و لا احد يهتم بالدراسه - استعداد للثانويه العامه -.ء
كثيرا ما وقفنا على ارجلنا - نحن فصلي الفائقات -في الشمس في فناء المدرسه بالحصه و الحصتين عقابا لنا لاننا بنصبح على بعض في الطابور الصبح .ء
لا استطيع ان انكر فضل هذه السيده علي فقد سمعت منها الفاظ (و افكار)لم تترد على اذني الا منها .ء
هذا هو نموذج موظف التربيه و التعليم -الذي يربي الاجيال - الناجح , فاسمعوا و اعوا.ء
يتبع
 
posted by nada at 8/26/2006 02:27:00 ص | Permalink |


16 Comments:


  • At 8/26/2006 4:13 م, Blogger noran

    انا سعيده جدا انك ابتديتي بالناظره كنموذج للفشل التعليمي خصوصا ان البشر هما اهم عامل في التعليم المدرسين الناظره كلهم علي دين بعض
    بس انا عايزه ازود عليكي حاجه في موضوع الطابور علشان ما حدش يفهمك غلط انت كنت بتقولي ان اهم حاجه بالنسبه لها ان النشيد يتقال بصوت عالي يرج مشتل كرم
    وتحية العلم عموما حاجه كويسه بس لما تفهمي ان مصر المعنويه ليها رمز تقدري انك تبرزيله احترامك كل يوم وكانه تجديد عهد مستمر مع مصر لكن المشكله وانا حاولت افهمها كده ان مافيش حد من البنات فاهم يعني ايه انتماء او بمعني اصح يعني ايه بنحيي العلم البنات مش اغبيا وممكن يفهموا بسهوله ان ده رمز لمصر وان احترامنا لمصر من احترامنا للعلم وده طبعا لما يعلمونا نحترم مصر لكن هما شافو كل التركيز علي الصوت العالي علو صوتكم يابنات صوتوا يا بنات وكأن ده هو الهدف الاسمي في الحياه ممكن واحد يكون بيهمس بالنشيد وحاسس بكل كلمه من واحد بيجعر بالنشيد
    لكن المشكله ان الناظره نفسها مش فاهمه يعني ايه تحية علم كل اللي اتعلمته انها تخلي المدرسه بتغني النشيد وخلاص ازاي بشخطها ولفها في المدرسه ما بتغينيش ليه يا كذا وكذا وطبعا طبيعة البشر انهم بيخافوا لكن اللي يليق بيهم انهم ييفهموا
    انا بس عايزه افكرك لما واحده سالتها بطيب نيه احنا ليه بنحيي العلم ردت عليها الناظره بالظبط كده
    ايه ايه سمعيني ياختي اصل انتوا يا 1/1 اتهبلتوا وشجرة هبلكوا طابت وطرحت واستمرت في المسلسل الردح ولم تذكر سبب واحد للنشيد
    حسبي الله ونعم الوكيل

     
  • At 8/26/2006 4:48 م, Blogger nada

    ما هي الحكايه دي عامله زي كل حاجه تانيه في التعليم بتاعنا يعني هما البنات علشان بيتفرض عليهم الانتماء او مصر المعنويه زي ما انتي قولتي حيكرهوها زي مثلا المعلومات لو معلومه انتي اللى دورتي عليها و رحتيلها حتستفيدي منها و تثبت في دماغك لكن لو اتفرضت عليكي و لازم تحفظيها و تمتحني فيها حتنسيها و انتي طالعه من باب اللجنه

     
  • At 8/29/2006 3:36 ص, Blogger Mamdouh Dorrah

    برافو عليكو يا بناتي
    رنبا يوفقكوا

     
  • At 8/29/2006 9:56 م, Blogger noran

    شكرا يا كورتكس
    ايه رايك في التمبلات الجامد ده انا فرحانه بيه

     
  • At 8/30/2006 1:34 م, Blogger BaTresYa

    ياسلاااام
    ايه المدونة العسل دي

    انتوا فكرتوني السنه اللي فاتت كن 3ث جـ

    فصل "جـ"دا كان فصل المشاكل

    وياما اتهرينا تهزييق مع اننا كنا اشطر فصل

    بجد كنت بكرهـ اني اروح المدرسه علشان عارفه اني هتهزق في اليوم عشرتاشر مره

    مش انا يعني اقصد هسمع كلام بسبب الشكاوي


    المهم انا كنت عايزهـ احكي حاجه مش عارفه اذا كانت بتحصل هنا في مصر ولا لأ
    احياناً كانوا بيفتشوا على الأظافر عندنا
    وانا كالعادهـ عمري ما بحضر الطابور "هانم مقفش انا ربع ساعه اسمع هجص واغني في الآخر سارعي للمجد والعلياء"المهم
    دخلت الصبح من باب المدرسه ولقيت بنات واقفين حولين المراقبه "المراقبه دي مساعدة الناظر وي ما تقولوا بس بيكون لكل مرحله دراسيه مراقبه"رح زوغت وطلعت على السلم جري
    سألت البنات في ايه
    قالوا ان في تفتيش على الأظافر

    قلت لهم ازاي يعني
    قالوا اللي ضوافرها طويله هيقصوا ها لها بالقصافه

    قلت يعني لكل بنت قصافه ؟؟

    قالول لا طعبا الكل سوا
    قلت ازاي يعني في الاحياء ناخد من اسباب العدوا استعمال ادوات المريض
    وفي صباح اليوم التاني ينفوا الكلام

    دا يدل على جهل المدرسه
    ولا جهل التعليم ولا جهلنا كلنا
    عالم بطيخ
    وهستنى بوست جديد ان شاء الله
    لحسن انا مخنوقه من التعليم خنقه سوده

     
  • At 8/30/2006 1:40 م, Blogger BaTresYa

    على فكره التمبلات تحفه بجد انتي اللي عملاه ولا دا قالب جاهز؟

     
  • At 8/30/2006 4:53 م, Blogger nada

    batresya
    اهلا بيكي ايوه كده عايزاكي دايما تشاركينا هنا بالذات لانك لسه سايبه الهم ده قريب
    حكايه الضوافر دي كانت موجوده في الابتدائي في ثانوي طلعتلنا حاجه جديده هي التفتيش على لون الطرح الطرحه يا اما ابيض يا كحلي لكن ابيض في كحلي لا شفتي التخلف
    و حكايه القصافه الواحده طب ماهم بيقولولنا القراءه مفيده و بعد كده الكتب عهده
    و التمبلات ده احنا طايرين بيه من الفرحه و احنا حايبينه جاهز بس ايه متفصل على المدونه

     
  • At 8/31/2006 6:46 ص, Blogger noran

    batresya
    اهلا بيكي في المدونة وانا مبسوطه ان التمبلات عجبك
    وموضوع الضوافر ده كان فعلا بيحصل في ابتدائي واعدادي لكن دلوقتي لا
    لا بمعني انه ما فيش قصافه للضوافر لكن بجد بيقصفوا الكرامه
    انا كتبت في كومنت فوق عبارتين من ردح الناظرة تخيلي بقي انه بينزل علي حد سيول من ده وفي وسط المدرسه
    غباء رهيب يعني كل انسان حر في مظهره وايه الصله بين الضوافر وقلة الادب دي ناس مخها حمض من زمان
    لكن انتي ليه ما بتحضريش الطابور دي بتبقي لحظات ممتعه

     
  • At 8/31/2006 12:07 م, Blogger fatma

    ندا و نوران : المدونة تصميمها اقل ما يقال عنه انه بديع و معبر جدا

    ندا : الناظرة مشكلتها انها اول سلطة ما تربطكش بها علاقة عاطفية يعني مش زي الوالدين ممكن تتسامح معهم و هما كمان يتسامحوا معاكي
    فكرتني بالناظرة بتاعتي كانت جبااااااااااااارة جدا ، و علي الرغم اني كنت طول عمري شقية و ما باخافش من حد بس كنت باتخض لما اشوفها او لما تكلمني و كانت برضه بتتعامل معايا باسلوب سخيف مش هانسي لما لمت كل اللي جابوا مجاميع عالية في ثانية ثانوي عشان تقول لهم انت اسيري و ها تفضل اسير المدرسة و لو ما ساعدتونيش ان الفصول تكون منضبطة هاتكتب لكم استمارات سلوك زي الزفت و دة هايأخر تنسيقكم في الكليات اللي انتن عايزينها و فضلنا في الرعب لغاية ما عرفنا ان استمارة السلوك دي مش مهمة اصلا في التنسيق

    الخلاصة الناظرة غالبا ما بتكون رمز للقيادة بالقهر و القمع يا ريت تتغير الصورة البشعة دي

     
  • At 9/01/2006 11:46 م, Blogger محمود عزت

    جميلة فكرة المدونة
    بجد جميلة
    إكتبوا كتير , كتير جدا
    أنا عايز أقرا هنا كل يوم تدوينة جديدة
    معلش يا نوران إحنا قرايب رغمإني ماشفتكيش غير مرتين تقريبا ! بس العشم بقى

    إكتبوا وأنا كل يوم حاجي و أقرا

     
  • At 9/01/2006 11:47 م, Blogger محمود عزت

    بالمناسبة
    انا عايز أعرف إزاي أغير البانر بتاع مدونتي زي اللي عندكم فوق ده !
    قولولي و أنا أكتب لكم قصيدة جديدة ليكم إنتوا بس

     
  • At 9/02/2006 7:59 ص, Blogger noran

    fatma
    شكرا ليك ويارب تفضلي متبعانا

    محمود عزت
    اهلا بيك وشكرا
    وحاضر هانكتب كتير وريارب حماستك في القرايه لينا ماتقلش خالص تزيد بس
    بالنسبه لشوفتني ده بمعني انك شوفتني بجد ولا قاريتلي ولا ان اسمك مدونتك نور
    لان انا ما اظنش انك شوفتيني
    وعموما العشم متبادل
    بالنسبه لقالب المدونه هتلاقي عندك هنا في صفحة التعليقات من تحت الكلمه دي
    Pannasmontata
    دي لينك لموقع التمبلات وعموما هتلاقي تمبلتات اكتر لو عملت بحث في جوجل بالاسم ده
    blog template
    ولو واجهك اي حاجه احنا في الخدمه
    علي قد معلوماتنا طبعا

     
  • At 9/02/2006 2:36 م, Blogger عمرو عزت

    أزال أحد مشرفي المدونة هذا التعليق.

     
  • At 9/02/2006 2:37 م, Blogger محمود عزت

    تصدقي إني كنت فاكرك نوران صاحبة بلوج شمعة !
    نوران شمعة هي اللي قريبتي!
    معلش!
    أصلي خدت لنك المدونة دي من تعليق على مدونتها !
    على كل حال أهلا بيكي برضه يا نوران
    و برضه إكتبوا كتير جدا هنا عشان أنا عايز أقرا كل يوم حاجة جديدة عن الموضوع ده :)

     
  • At 9/23/2012 12:41 م, Anonymous العاب النادي

    يعطيك العافية

     
  • At 10/08/2012 10:12 ص, Anonymous العاب

    well done